wala akong pakialam kung paano ako tingnan ng mga katabi at kaharap ko pero sasakay at sasakay pa rin ako sa jeep 'pag uuwi ako mula sa opisina. madalas kasi medyo pormal ang bihis ko at minsan hindi bagay sa marumi, mainit at mausok na sasakyan. pero wala akong pakialam. meron akong P5.50 at 20 minutong biyahe pauwi. malayo ang nararating ko.

pinakagusto kong sumakay sa jeep tuwing dis-oras ng gabi, bandang alas diyes, alas onse at kakaunti na ang sasakyan sa kalye. oo, mapanganib, pero ewan ko ba. marahil gusto ko lang na sa mga ganintong oras ipinamamalas ng drayber ng jeep na siya nga ang hari ng kalsada at walang takot na paliliparin ang mahabang sasakyan habang gumegewang-gewang itong parang lasing sa kalsada. sa isang malakas na busina isinisigaw nito--ako ang hari, sisingit ako kung saan ko gusto, lulusot ako sa pinakamakitid na pasilyo, tumabi ka kung di ka sasakay.

at minsan naman, marahil sa kagustuhang tumakas sa pagkabagot sa maghapong pagmamaneho, may mga drayber na ubod ng lakas magpatugtog at naglalagay pa ng malalaking speaker sa ilalim ng upuan. hindi ka aantukin sa jeep na hindi lang gumegewang kundi dumadagundong din, mula talampakan hanggang dibdib. samahan mo pa ng mapupulang ilaw na minsan patay sindi. kulang na lang serbidorang may dalang beer at mga babaeng nagsasayaw. maliban na lang siguro kung biglang may maririnig kang "kelangan pa bang i-memorize yan!!??"

at ang mga pasahero--mga dayuhang magkakakilala lamang sa tingin at sa pagbabangga ng mga braso sa bawat hinto ng sasakyan. madalas makakakita ako ng isa o dalawang pasaherong abala sa pagtanga sa buhay sa labas, lumilipad ang isip habang hinahampas ng maruming hangin ng lungsod. minsan isang saleslady sa shoemart, isang mamang naka sando at tsinelas, isang babaeng nakahawak sa braso ng kanyang nobyo. minsan ako.

isang sigaw ng "para!", dalawa kung bingi ang drayber. o di kaya "batak mo, stop ako" para di na kailangang sumigaw, kumatok o sumutsot. sapagkat ang katok ay sa pinto at ang sutsot ay sa aso at "god know, hudas not pay". lalampas ako ng kaunti sa dapat na babaan. pero okay lang. sa P5.50 at 20 minutong biyahe, malayo ang nararating ko.